Yañı iş görme başlağan «Abusupyan» degen qumuq kitap izdatelstwonu aslu muradı – qumuq tilni aburun götermek, milletni ruhun artdırmaq, esin uyatmaq.
Şo murat bulan xalqğa paydalı bolar yimik kitaplar çığarılıp, yurtlağa, şkolalağa wa özge yerlege yetişdirilejek. Kitaplanı da xalqğa, ayroqda cahillege soralıp, barıbızğa da paydalı bolar yimikleri çığarılajaq.
İzdatelstwoğa sıylı adam wa ullu alimibiz Abusupyan Akayewni atı qoyulğanı da nehaq tügül. Haliden yüz yıllar aldın Abusupyan özü çığarğan kitaplanı yurtlağa barıp, adamlanı arasında yayıp yürügen. Onu kitapları özünden soñ da qoläzıwlarda xalqnı arasında yaşap, payda geltirip turğan wa hali de tura. Nege tügül de, ol yañız xalqğa paydalı, tarıq, bolmasa bolmayğan kitaplanı yaza bolğan. Şolanı birisi – «Qılıq kitap». Biz de şonu uçun işibizni «Qılıq kitapdan» başlağanbız.
Şu yañı işni ne maʼnası, ne ahamyatı bar?
Birinçiley, şonu bizin ayrıça haribiz uçun da, sawlay milletibiz uçun da paydası bar. Yaşaw görsetip turağan küyde, milleti bulan öktem bolmayğan, ana tiline abur etmeygen, onu bilmeygen adamnı başğa xalqlanı arasında da sıyı bolmay.
Ondan qayrı da, qumuqlanı bek bay kulturası, adatı-qılığı wa teren tarixi bar. Bizden aldağılar şolanı bolğan küyünde bizin dewürge yerli yetişdirgen. Qalğan yağı – gelejek naslular uçun şolanı saqlamaq wa artdırmaq – bizin naslunu namusu, bizin borçubuz.
«Abusupyannı» harakatı yañız kitap çığarıw bulan dazulanıp qalma tüşmey, göz alğa tutulğan dağı da proyektler bar.
Şolay bizin bulan yüregi bir, milletni ruh baylığın artdırmağa belsengen watandaşlarıbıznı qastı bulan qumuq sayt da wa internet telewideniye de açılğan. 10 yıllar aldın qumuq alimleribizni bir bölügü Qumuq ilmu-madanyat camyatın (KNKO) qurup, jurnal, Qumuq ensiklopedya sözlügün çığardı wa özge paydalı çaralanı görüp tura. Bular barı da paçalıqdan xarjsız, öz güçleribiz bulan etilegen işler.
Milletni yarıqlandırıw, güçlendiriw uçun dağı da köp işler etme bola. Paçalıqnı zakonları bizge barı da imkanlıqlanı bergen. Biz özübüz şo imkanlıqlardan paydalanıp bajarma gerekbiz.
Qumuq izdatelstwoğa şu nomerge seyleme bolasız: 8 928 540 24 70.
İzdatelstwo ABUSUPYAN