Hali-halilerde Soçide “Rossiyanı pahmularını soyuzu” degen yaş yırawlanı V Xalqara festival-konkursu ötgerildi. Şonda Rossiyanı 40 regionundan xoreografyada, wokalda, asil giyimleni görsetiwde (dizayn) yaş pahmular ortaqçılıq etdi. Şo konkursda üç yırnı yırlap, xasawyurtlu qumuq ulan Adil Usumiyew birinçi yerge yes boldu. Özleni pahmusun görsetme gelgen 115 adamdan Adil birinçi yerge çıqmaqlığı – bizin millet uçun da, respublika uçun da ullu süyünç wa daraja. Ayroqda “Anay desem, ananay» degen sözler bulan başlanağan qumuq xalq yırı tıñlawçulağa wa cürige bek taʼsir etgen.
Adil Usumiyew Tümen oblastnı Radujnıy degen posölogunda liseyni bitdirgen. Mundağı madaniyat qalada ol rok-gruppada ortaqçılıq etgen. Soñ Moskwada Muzıka akademyanı estrada-caz saniyatını paçalıq muzıka uçilişesinde oxuğan. Ondan soñ Adil Maymonidanı atındağı muzıkalı Paçalıq klassika akademyasına oxuma tüşe wa hali üçünçü kursunda oxup tura. Ol Xasawyurtda yaşay wa “Spartak” degen madaniyat qalada işley. “Qıpçaqlar” degen muzıkalı gruppanı ortaqçısı. Adil “Muzıkalı globusnu” Gran-prisin de qazanğan. Moskwada ötgerilgen “Haybatlıq paraxatlıqnı qutğarar” degen Xalqara konkursda birinçi sawğatğa da ş bolğan.
Hali Adil Usumiyew “KämaZ qurdaşlanı cıya” degen Naberejnıye Çelnı şaharda ötgerilegen yaş pahmulanı II Xalqara festival-konkursunda ortaqçılıq etmek uçun oñarıla. Adilni bu üstünlükleri bulan qutlay turup, gelejekde de oğar özünü pahmusun ör darajada görsetme wa aldınlı yerleni alma nasip bolsun dep aytma süyebiz.
Ya. BİYDULLAYEW