Tarğu tawnu aylanasındağı Kaxulay, Tarğu, Albörügent, Ağaçawul yurtlanı şahar wa respublika yolbaşçı qurumları bulanğı «toğa tartıwu» dawam etile.
İyün aynı 1-nde Tarğu tawnu betinde, bırınğı Amirxangent bolğan yerde, şo yurtlanı xalqı cıyılğan edi. Olar ata-babalarından warislikge qalğan az busa da aziz topuraqlanı qorumaq uçun har türlü çaralar göre.
Olar aytağan küyde, bir-bir hakim taypalar tawğa yeslik etme qaray, onu tarixi xojayınlarını ixtiyarına qaytarmas uçun, ne hillağa da, ne yalğanğa da bara. Xalqnı adilli talapların yerge ura. Tarğu tawnu dört de yaqdan özge milletleni wakillerini «qalaları» bulan qurşap, qumuq yurtlar şaharğa dönüp, siñip, şolanı atları yañız tarixi kitaplanı betlerinde qalsın uçun qast ete.
1999-nçu yıl Tarğu, Kaxulay, Albörügent yurtlanı camiyatlarını sipteçiligi bulan salınğan esdelikni aldındağı yaşıl maydanha şo gün köp-köp xali-xalça yayılğan edi. Yañı mecitni kürçüsü salınajaqğa baylawlu bolup ötgerilgen mawletge yerli xalqdan qayrı, Xasawyurtdan, Köstekden, Toturbiyqaladan, Şawxal Yañıyurtdan, Qorqmasqaladan, Töben Qazanışdan, Xalimbekawuldan, Buynakskiden, Qaqaşuradan, Qarabudağgentden wa özge qumuq yurtlardan gelgen wakiller de bar edi.
Mawletni Tarğu mecitni qadisi Alawutdin haci yürütdü. Ol aytğan sözler, nasihatlar cıyılğanlağa bek taʼsir etdi. Mawlet bitgende, «belgi taşnı» açılıwu boldu. Onu üstüne yayılğan yaşıl tüsdegi qumaçnı Kaxulay yurt administrasyanı başçısı Salaw Aliyew çeçdi. Marmartaşğa: «Allahnı atı bulan 01.06.2008-nçi yılda Amirxangent yurtnu yañırtıw işni başladıq. Tarğu, Kaxulay, Albörügent, Ağaçawul yurtlanı birleşgen camiyatı», — degen sözler yazılğan.
Yurtlular şo yañırtıw işni yañı mecit quruw bulan başlama süye. Mecitge atı dañha aytılğan görmekli paçalıq çalışıwçu Çopan şawxalnı atı qoyulajaq. Söylewlerden soñ cıyılğanlar Dağıstannı Prezidenti M.Aliyewni atına yazılğan käğıznı ariw gördüler wa bir tawuşdan qabul etdiler. Namaz qılıp, aş aşadılar. Allah qabul etsin olanı şo sadağaların!
- Biz esgi yurtubuznu yañırtıwnu işin başlağanbız. Axırına çıqmaylı da toqtama xıyalıbız yoq, — dey mecitni quruwnu işin yürütegen qurum komitetni başçısı Mahammat Zalibekow. — Eger de hakimler bizin talaplağa qulaqasmasa, şaharnı lap ullu maydanında palatkalar da qurup, geçe de, gün de toqtajaqbız. Tek tutğan yolubuzdan qaytmajaqbız.
Mahammat ağawğa wa barı da qumuqlağa muratlarına yetişme Allah sawluq bersin. Allah buyursa, yañı mecitni içinde barıbız da cıyılıp, Yaratğanıbızğa qulluq eterbiz, sucda qılarbız.
"Yoldaş" gazetni muxbiri.