Hürmetli oxuwçular!
Gazetibizge özünü bay yaratıwçuluq ömüründe birinçi yüz yıllıqnı tolturmaq uçun beş yıl qala. Bu gezik biz 95 yıllığına baylawlu bayram ete turmaybız, amma sıylı tarxnı esgermey, belgilemey de bolmaybız. Bilesiz, 1917-nçi yılğı inqılapnı uyandırıwçu (canlandırıwçu) yılı şartlarında bürlenip, yazbaş ayı maysanda (aprelde) birinçi qumuq gazetibiz çığa başlağan.
Gazetibizni yaşawundağı bu sıylı tarxnı biz, gazetni yaratıwçuluq qulluqçuları, özübüz özübüznü sıylamaq uçun tügül, ötgen yolubuznu, etgen işleribizni qıymatlamaq uçun, gelejegibizni belgilemek uçun belgileybiz.
«Yoldaş» – milletibizni özden sesi – tünegünden bugünge wa tañalağa iñ inamlı sapar yoldaşı, sementli kürçüsü, süyüwnü, sıynı, milli birlikni wa daimlikni yaqçısı, milli talpınıwlanı bayraqçısı, milletni tayawu.
…Esigizdedir baliki de, bizge bizin yaşlığıbızda ullular köp üyrete ediler birleşgen el tozulmas dep. Buğar baylawlu şulay bir misal.
Köpnü görgen, köpnü bilgen qartatay ulanını ulanın haqılğa sınamaq murat bulan, üyünü terezesini bir müyüşüne yabuşdurulup etilgen qarlığaç uyadan quşnu qarıwsuz balasın qoluna alıp yaşırıp, torunun çaqırıp soray:
– Ayt çı, balam, şu meni qolumdağı qarlığaç bala sawmu, tügülmü, – dep. Wa şo mühlet bulay oy da qura: saw dese, qısıp öltürermen, tügül dese, uçurarman dep.
Balasını balası bu sorawğa:
– Sen neçik bolğannı süyer ediñ, atayım? – dep, sorawğa soraw bulan cawap bere.
Şo zaman qart balasını balası, gertiden de, haqılbaş bolğanına mükürlük ete…
Hürmetli oxuwçular!
Qaysı busa da bir milletni 95 yıllıq öz gazeti, milli tayawu bolmaq ullu üstünlük, ullu daraja, baylıqdır.
Bilebiz, bu gazet bizge, bugün munda çalışağanlağa, onu başın tutğanlağa, sawğat hisapda tapşurulmağan, ol bizge bir yaşaw qural, yaratıwçuluq qural hisapda berilgen. Şo quralnı birden-bir ittileşdirip, qarıwlu etip, yañı nasluğa tutdurmaq, ozoqda, bizin borçubuz. Tek, bilme tüşe, bu iş yañız bizden hasil bolmay.
Gazet özünde işleygenler uçun tügül, oxuwçuları uçun çığa. Gazetni gelejegi – qısmatı – sizin ixtiyarığızda. Siz gelejegibiz neçik bolğannı süyer edigiz?
Bizge, gazet çığarağanlağa, sizge, gazet oxuwçulağa, bir zat qala. O da gazetni aylanasında «tilde, pikirde, işde bir bolmaqdır», sıdıralarıbıznı artdırmaqdır, sıqlaşdırmaqdır.
Bilesizdir, ozoqda, gazet – o bir informasya, maʼlümat qural. Haligi biz yaşayğan dewürde busa maʼlumatğa yes bolğan adam, özünü bugününe yimik, onu tañalasına da, hatta gelejegine de yes bolağanı haq. Milli gelejegini hayın har xalq özü etmey busa, özgeler de etmeygeni de haq.
Sizge bir tilewübüz bar. Birgine-bir milli gazetigizge, maʼlümat, yaşaw quralığızğa yazılıp da, yazıp da yes boluğuz!
…Gazetibiz – gelejekni yolun tutğan milli keriwanıbız, 95-lerden, tawlardan yimik artılıp bara…
Yaxşılıqlanı, yaxşı umutlanı yolunu artı uzaq bolsun!
Bu tarxı, bugünü wa gelejegi miñ keren qutlu bolsun!
K. Aliyew, baş redaktor.
«Yoldaş», 30.12.2012