"Yoldaş" gazetni çaqırıwuna göre, oxuwçular Yırçı Qazaqnı pamätnigin yañırtmaq uçun xarj cıyıp başlağanda adamlanı arasına canlanıw tüşdü.
Birewler şu işge ruhlanıp, bolağan qoşumun etip turalar.
Başğalar busa, qumuq xasyatıbızğa göre, şo yaxşı iş ekenine şeklik etip söyleyler. Saykimasala, pamätnikni remontun şahar administrasya, hukumat etme gerek edi deyler.
Birdağılar, aqçanı qumuq baylardan, hakimlerden cıyma gerek dep haqıl bereler. Harisi bir xabar da qurup, aytdı-quytdu yürüle.
Hatta Yırçı Qazaqğa sucda qılıp turma gerek şairleribiz de qoşulmaylar. Yazıwçulanı soyuzu şu aksiyanı bayraqçısı bolma gerek tügülmü edi? Yazıwçular qoşulup yiberse, adabyatnı süyegen yüzler bulanğı qumuq oxuwçularıbız da olanı artına tüşejek edi. Yırçı Qazaqnı fondu bar dey edi. Qayda fondnu qoşumu, başğalağa çaqırıwu?
Şahar administrasya da, hukumat da özler etegenni etgen: yer görsetgen, pamätnikni turğuzğan. Dağı da oğar onu restawrasyasın da etsin — şoğar qarşı gişi yoq. Şolanı etdirip bolağanlar etdirsin. Tek biz de gerekbiz çi özübüz xalq, millet ekenibizni görsetme. Yırçı Qazaqğa qumuq xalqnı süyüwüne başğalar da suqlanağan küyde, biz de özübüz özübüz bulan öktem bolağan küyde yaxşı, özden iş etip bolabız.
Onu ornunda busa, bölük-bölük bolup, tarıqsız diskussiyalar yürütebiz.
Men añlayğan küyde, şu aksiya — barı da qumuq xalqnıki, barıbızğa da bir yimik tiye: hakimlege-baylağa da, qalğanlağa da. Har gezik baylağa tilenip turmağa da oşamay. Yırçı Qazaqnı esdeligi uçun da prostoy xalqnı güçü bulan etilgen iş qıyışıwlu bolajaq dep esime gele.
Yañılış bolma da yarayman, tek köpleni şu aksiyağa qoşulmayğanlığını aslu bir sebebi bar — qızğançlıq, ortaq iş uçun, milletini örlügü uçun 300-500 manatın qurban etme çomartlıq yetişmeygenlik.
Şo qızğançlıqnı yaşırmaq uçun ne bahana da tabalar. Yaxari, qoşuluğuz ortaq işge, soñ şo haqda ne oylaşağanığıznı yazığız "Yoldaşğa". Açıq küyde. Baliki, şu aksiyanı oylaşğanlar yañılışadır. Artından söylemeyik.