Onu yimik birmen degen rejissör bir asruda bir keren tügül tuwmay.
Hamit Rustamow ... dağı bir söz de qoşmaylı, yañız onu atın esgerip qoysaq da, köp zat añlaşıla, nege tügül, ol teatrda ullu iş usta küyde salğan köp spektakller göz alğa gele. Şolardan Hamit Aliyewiç yañız «Ayğazini» wa «Qaraçaçnı» salıp qoyhan edi busa da, ol bizin esibizde teñleme teñi yoqday pahmulu rejissör hisapda qalajaq edi. Rustamow arabızdan tayhanda, aqsaqallar da aytağanlay, yartı dünyadan gerti dünyağa getgende, onu şo pahmusu birden-bir açılıp, birden-bir ullu, birden-bir yarıq bolup görüne başladı. Sahna inçe saniyatğa yüregi awağanlar şonu xasoqda güçlü his etgenlik özlügünden añlaşılıp qala.
Sentäbr aynı 15-nde Hamit Aliyewiç Rustamowğa 95 yıl tamamlanajaq edi. Tek, hay aman, o bizin arabızda yoq. Amma onu haqındağı yarıq esdelikler yaşay.
Har xalq özünü anadaş teatrın yaratmağa wa onu bulan öktem bolmağa borçlu...» — dep yazğan A.N.Ostrowskiy. Anadaş Qumuq teatrıbıznı yaratıwda, onu atın dañğa çığarıwda Hamit Aliyewiç karnı-göñü bulan etgen qulluq neçe de ullu. Şonu bilmeygen nagäh bir qumuq da yoqdur. Muna, şo sayalı ol gözden taysa da, göñülden taymayğanı, bizin yürekleribizni töründe-öründe yaşayğanı, ol salğan spektakller hali de sahnadan taymayağanı, çinkdesi — qılığın da tas etmes, qılğa da sürünmes qumuq xalq şo spektakllerde qaytıp-qaytıp urulağan xarsın oğar anası bergen aq sütdey halal etegeni. Nege etmesin dağı, Hamit Aliyewiç Rustamow 200-ge yuwuq spektakl salğan. Yañız özü 20-dan da artıq pyesa yazğan, şonu da üstewüne, Qumuq teatrnı qısmatı haqda köpler köp süyüp oxuyğan hayran tiziw kitap da çığarğan.
Xalqnı Rustamowğa baqğan yaqdağı süyüwü sözlege sıyışmasday ullu edi.
Nege desegiz, onu yimik birmen degen rejissör bir asruda bir keren tügül tuwmay. Şo sayalı oğar haq yürekden: «Hamit Aliyewiç, hali de sen bizin bulansan! Xalqıñ bulansan!» — demege süyebiz.
Ahmat CAÇAYEW