Mart aynı 25-nde Qumuq teatrda Rossiyanı xalq artistkası Burliyat İbrahimowanı konserti boldu. Zalğa cıyılğanlar barı da süyümlü yırawuna, bülbül sesli Burliyatnı sarınlarına tıñlamağa cıyılğan ediler. Ullu sahnadan taba ol qarawçulağa sawhat etgen sarınlarını sanawu 400-den de artıq. Har konsertine ol yañı-yañı yırlanı hazirley. Muna şo gün de onu konsert axşamı öztöreçe tamaşa başlandı. Konsert berilişni qumuq ulan Najmutdin Atlıgişiyew yürütdü. Ol yübilärğa bağışlanğan girişiw sözünden soñ, sahnağa Burliyat Akaşimownanı çaqırdı. Yırawnu issi qarşılay turup, sawlay zal ereturup xars urdu. Ol da, xalqına barakallasın bildire turup, tıñlawçulağa yañı yırlarından bir neçe yır sawhat etdi.
Muzıkalı axşamda yırlanğan yırlar barısı da Burliyatğa bağışlanğan edi. Belgili yırawlar Ruqyat Satıbalowa, Ruquyat Hamzatowa, Zuhra Aselderowa, Leyla Aliyewa, Burliyat Elmurzayewa, Zoya Çunayewa, Zaynap Absamatowa, Zuğra Mecitowa, Calal Bekeyew, Xadijat İbrahimowa, Qumuq teatrnı artisti Baysoltan Osayew wa şolay da özge yırawlar yübiley axşamda qarawçulağa yañı yırlar sawhat etdi.
Yırawlar Burliyat İbrahimowanı muzıkalı axşamında
Şatlı maclisde Burliyat İbrahimowa bulan birçe cahil yırawlar da arağa çıqdı. Olar ullu yıraw bulan birçe duet yırları qarawçulanı ayroqda kepine geldi. Milleti mıçığış busa da, pahmusu yañı arağa çığıp gelegen Elbike Camalutdinowa qumuq tilde aytğan sarının kim de uşatarday yırlama bajardı. Ullu sahnağa birinçiley göterilip gelegen yırawlarıbıznı arasında Arsen Askerxanow Z. Dayitowanı sözlerine göre oñarılğan yırın zalda olturğanlar xars uruw bulan qarşıladı.
Şatlı axşamnı yürütegenleni birisi Najmutdin Atlıgişiyew de Burliyat Akaşimowna bulan bir neçe keren duet bulan yırlağan yırlar qarawçular uçun ullu sawhat bolup toqtadı.
Yübiley axşamda aslu halda belgili kompozitorubuz Xizri Batırgişiyewni muzıkasına göre salınğan yırlar edi. Şo gün pahmusu arağa çıqğan Elderxan Kazimow yazğan maqamlar da qulaqğa ariw çalına edi. Ol özü de Burliyat İbrahimowa bulan birçe «Yulduzlar» degen yırnı zaldağılağa sawhat etdi. Qıstaman Haciewa yolbaşçılıq etegen «Yulduzlar» degen biyiw ansambl de yübilärnı qutlay turup, qumuq küyge göre usta biyimege bajardılar.
Burliyat Akaşimowna yañız yırlanı üstünde işlep qoymay eken. Şo gün axşam ol yaratıwçuluq bulan da maşğul ekeni arağa çıqdı. Qumuq teatrnı artistleri ol yazğan bir neçe şiʼrunu çeber küyde oxudular. Burliyatnı xalqı bulan yoluğuwu şo güngü qarawçulanı esinde köp zamanğa qalajaq. Nege tügül, ol şo gün tıñlawçulağa 20-dan da artıq yañı-yañı yırların sawhat etdi. Madaniyatda yır soqmağın salğan, belgili tuxumdan çıqğan Burliyatğa tıñlawçular köp gül baylamlar sawhat etdi.
Bariyat Ölmesowa. Ruslan Cambolatow çığarğan suratlar.