1934-nçü yıl 16-nçı aprelde Sentralnıy İspolnitelnıy Komntetni qararı bulan Sovet Soyuznu İgiti (hali Rossiyanı İgiti) degen ör at toktaşdırılğan. Şo at daw ahwalatlarda görsetgen ayrıça qoççaqlığı uçun berilgen. Ullu Watan dawnu yıllarında İgit at miñler bulanğı soldatlağa wa ofiserlege berilgen. Qumuqlardan şo atğa beşew yes bolğan — Abdurahman Abdullayew, Yusup Akayew, İsa Soltanow-Qlıçew, Elmurza Cumağulow, İrbayxan Biybolatow. Artda daw yıllardağı qoççaqlığı uçun, Soyuz buzulğandan soñ Abdulhakim İsmayılowğa da Rossiyanı İgiti degen at berildi.
Belgili tankist Elmurza Cumağulowğa busa Sovet Soyuznu İgiti degen at 1944-nçü yılda Belorussiyanı topurağında görsetgen qoççaqlığı uçun berilgen. 23 yıllıq tankist, panton köpürden Drut özenni arigi yanına yañız çığıp, nemisleni bekliklerin buzğan wa sovet asgerni alğa barıwuna yol açğan. Şondan soñ komandirini buyruğuna göre, yuwuqdağı yurtda yerleşgen, yıraqğa urağan topların dağıtğan. Artındağı gün, birdağı tank da bulan birigip, artğa tartılıp barağan nemisleni ullu kolonnasın qolğa alğan.
Şo ör at 76 yıl alda toqtaşdırılğan busa da, bugünlerde de bayram yimik ötgerile. 16-nçı aprelde "Xasawürt rayon" degen munisipal quruluwunu başçısı C.Salawownu tapşuruwuna göre, orunbasarları Wahit Qasımow, Hüsenali Abakarow, pres-sekretarı Aqaw Aqawow wa rayon bolnisanı baş wraçı Anwar Azamatow İgitni qutlama bardı.
- Elmurza Biymurzayewiç, bugün sizin bayramığız,- dedi W.Qasımow.- Birinçiley, sizin rayonnu başçısı, "Birikgen Rossiya" degen partiyanı Politsowetini sekretarı C.Salawownu atından qutlama süyebiz. Qutlaw bulan birge, ol sizge şulay birdağı quwançlı xabarnı bildirmekni de tapşurğan. 9-nçu may bolğança sizge gelegen oramnı asfalt etme göz alğa tutulğan. Sizge sawluq wa uzaq ömür yoraybız.
- Siz de köp saw boluhuz,- dedi Sovet Soyuznu İgiti Elmurza Cumağulow. — Rayon administrasya mağa har zaman da tergewün boldura. Daw yıllar artğa gete, şonda ortaqçılıq etgenler de kemiy bara. Har weterannı üstüne barıp, küyün-halın sorasa da, şo da dawnu ortaqçıları uçun ullu sawğat.
Gelgenler barısı da Elmurza Biymurzayewiçni qutladı, oğar güller wa aqça sawğat berdi. Alda Üstünlüknü bayramı. Rayon administrasyanı başçısını qararı bulan şo günnü qurumlu ötgermek uçun çaralar görüle wa dawnu barı da ortaqçılarına ayrıça tergew berilejek. Rayonda olar bugünge 18 adam tügül qalmağan.
Opublikowano: gazeta "Yoldaş". 23.04.2010.