«Abusupyan» degen qumuq kitap izdatelstwo açılğanlı (getgen yıl noyabr ayda) köp bolmay busa da, onda milletni madaniyatın artdırarday bir neçe kitaplar çığıp tura. Muna şolanı birleri.
Abusupyan Akayew, Nuhay Batırmurzayew. «Qılıq kitap wa Yañı tarbiya». Hazirlegen, baş sözleni wa bayanlıqlanı yazğan Hasan Orazayew.
Milana Gobzayewa (Çeçen Respublikanı qumuqlar yaşayğan Güçükürtundan). «Rokowaya sudba». Powest.
Ziyawdin İdikow (Endirey). «Cinleni haqında». Din kitaplardan maʼlümatlar.
Umukürsün Suleymanowa (Qazmaawul). «Allah qudrat bersin». Şiʼrulanı cıyımı.
Zyawutdin Canakayew (Käpir Qumuq). «Sudba naşa, prosti nas». Esdelikler, proza.
İsaxan-haci Haciew (Botayurt). «Allah qabul etsin. Sapar kitap». Tarix, yolawçunu tepterinden.
Yaxa Zaurowa (Adilyañıyurt). «Yaşlar – qatarbaşlar». Yaşlar uçun şiʼrular.
Ahmat Ustarxanow (Erpeli). «Namusu qıynay busa». Xabarlanı cıyımı.
Abdulla Açaqanow (Yaxsay). «Yaşawnu tolqunları». Şiʼrulanı cıyımı.
Galip Akayew. «Rawnina w ogne». Wospominanya emigranta.
Olay da Hasan Orazayew wa Habiybulla Alxanhajiyew hazirlep Abusupyan Akayew tizgen naqşbandiy tariqatnı şayıxlarını silsilası da plakat etilip çığarılğan.
Uzaq qalmay xasawyurtlu jurnalist, tilni axtarıwçu İbadulla Haciewni «Qumuq tilni maʼnadaş sözlerini», pahmulu şair Abdulhamit Mamayewni (Xasawyurt) şiʼrularını, Bela Hacigeldiyewanı (Tamazatöbe) oçerklerini cıyımları, şolay da Yusup Saypudinownu (Endirey) nazmularını «Yürek söyley, awzum tura yabulup» degen, Tamanqız İjaqowanı (Yaxsay – Xamamatürt) «Eki yurtum» (şiʼrular) wa Abusupyan Akayewni «Dünya bulan axırat» (Hasan Orazayew oñarğan) degen kitapları çıqma gerek.
Şolay dağı da qumuq tilden wa adabiyatdan dars beregen muallimler uçun metodika posobiyeler wa özge kömekçi kitaplar, sözlükler çığarma göz alğa tutulğan.
Sıylı Abusupyannı atı qoyulğan izdatelstwonu halige kitaplanı hawayın çığarma imkänlığı yoq, tek şolar lap uçuz bahada bolajaq. Xalqğa bek tarıqlı tınç satılar yimik bir-bir kitaplanı izdatelstwo, öz hisabına da çığara wa olanı oxuwçulağa yetişdirmege qast ete.
Raşit Harunow