Sen arğansız qalar dese,
Arğan soğup talar dese,
Aziz xalqıñ az sama da
Seni esden salar dese,
İnanmasbız, Burliyat.
A.Caçayew.
Geçegi açıq kökdegi miñler, millionlar bulanğı yulduzlar barısı da bir yimik yarıq bermey. Tek olanı birleri bar göz qamaşdırarday lans etegen. Qumuqtüznü yulduzu, Rossiyanı xalq artistkası Burliyat Akaşimowna İbrahimowa xalqın, elin dañğa çığarğan alay da-alay lans ete çi, onu süykümlü yüzü, qoñurawday çalınağan yırları qarawçulanı wa tıñlawçulanı süyündüregeni köp yıllar bola.
Dağıstanda da, sawlay Rossiyada da Burliyatnı qoñurawlu tawuşuna yesir bolmağan tıñlawçunu tapmağa bajarılmas edi dep oylaşaman. Şolay dür de dür.
Onu taw özenni süzük suwunu ağımı yimik aybat añlı tawuşu, gertiley de, qarawçunu süyüne turup tıñlamağa borçlu ete.
Bülbülnü xalq onu yürekge balham bolağan çarnawu-yırı sebepli asil canğa hisap ete. Burliyatnı bülbül bulan teñ¬leşdiregenine de, ozoqda, onu bülbüldey tawuşu sebepli. Amma, dep uzatıla pikrularım, bülbül degen söz de, Burliyat degen söz de qulaqğa bir yimik çalınağanı da, baliki, habas tügüldür.
Amma, dep de oylaşaman, bülbül yañız yazbaşda yırlay, Burliyat busa yılnı qaysı waqtisinde de – yazbaşda da, yazda da, güzde de, qışda da yırlay.
Yırla, Burliyat, yırla! Sen yırlasañ, yüreklege süyünç gire. Yırla!
Aprel aynı 26-sında Qumuq teatrnı ullu zalında Burliyat İbrahimowanı yaratıwçuluq axşamı boldu. O Burliyat İbrahimowanı yübileyine bağışlanğan edi. Şonda bizin süyümlü yırawubuz Burliyatnı atına örde esgerilgen yimik wa özge xıylı alğışlar etildi.
DALHAT.