Aççı xabar tez yayıla. Bizin redaksiyağa da gazetni gezikli şu nomerin tapşurmağa dep hazirlik görüp turağan sahatlarda pahmulu yazıwçu, şair, jurnalist Mahammatamin (atası Mollaqa misgan oğar Alxuzur dey edi) Adilxanow yaşawunu 65-nçi yılında geçindi degen qayğılı xabar yetişdi.
M.Adilxanow 1946-nçı yıl Yaxsayda (Xasawyurt rayon) yurtda da, rayonda da, sawlay Dağıstanda da belgili teren haqıllı tamaza Mollaqanı ahlüsünde tuwğan. Yaş yıllarından berli de, sözge usta atasını, onu qardaşı pahmulu yazıwçu, şair Şarip Alberiyewni, yaxsaylı özge pahmulanı taʼsirini tübünde ösgen, tarbiyalanğan, olar onu gelejek pahmusuna kürçü de salğan.
DGU-da oxup bitip, başlapğı yıllarında yurt, rayon idaralarda işlegen soñ, «Qumuq tüz» degen rayon gazet açılğanlı, onu muxbiri bolup, pahmulu, taʼsirli maqaläları bulan miñler bulanğı oxuwçulanı raziligin alğan, esinde qalğan.
Mahammatamin qumuq oxuwçulağa özünü pahmulu, teren maʼnalı şiʼruları bulan da yuwuqdan tanış edi. Ol Rossiyanı Yazıwçularını soyuzunu çleni, bir neçe şiʼru kitaplanı awtoru da dür.
Mahammatamin redaksiyada iş qurdaşıbıznı yübileyine bağışlanğan bereketli maclisde ortaqçılıq etip getgenli de muna bugün bir ay bite edi. Şondağı masxarası, tatli tili bulan da köp zamanlağa esibizde qalajaq.
M.Adilxanownu «Yoldaş» gazetni artdağı nomerlerini birisinde çıqğan şiʼru bölügü de 9 (qarağız) köp oxuwçulanı tamaşağa qaldırğan edi. Hatta göz tiygendey bolup da qaldı buğay.
Neçik alay da, Mahammatamin Adilxanow arabızdan getdi. Onu qurdaşları da, tanığanlar da, eşitip bilegenler de bu qayğılı xabarğa bek talçıqdı wa ahlüsüne, dos-qardaşlarına terenden qayğırışağanın bildire. Allah rahmat etsin!
«Yoldaşnı» redaksiyasını qulluqçuları.