İül aynı üçünde Mahaçqalada Dağıstanda çığağan milli gazetleni oxuwçularını birinçi, gengleşgen respublika konferensiyası ötgerildi. Barı da qumuq rayonlardan, şaharlardan gelgen «Yoldaş» gazetni oxuwçuları, qurdaşları baş redaktornu ullu kabinetine sıymasday cıyılğan edi. Şo gün Qumuq teatrda sahat ekide konferensiya başlanğança, redaksiyabızda, «dögerek stolnu» aylanasında laqır boldu.
Qonaqlağa xoşgeldi etgen soñ gazetni baş redaktoru Kämil Aliyew bulay dedi:
– Birinçi respublika konferensiyada göterilegen aslu masʼalä – milli maʼlümat qurallanı bugüngü halı wa gelejegine baylawlu alda toqtağan masʼalalar. Bu masʼalä nege arağa çığağannı da aytayım. Siz bilesiz, respublikada, telewideniyede artdağı waqti milli peçat öle, söne, şonu gerekligi yoq degen pikrular arağa çığa. Milli qurallarda çalışağanlanı yanından şolağa qarşı pikrular bolmadı dese de yaray. Gelejekde ne yol tutmağa tüşe, arağa çığağan şo masʼalalanı neçik çeçme gerek degen murat bulan birinçi konferensiya ötgerile. Konferensiyanı ötgerme boynuna alğan Milli qurallağa wa massa kommunikasyalağa qarayğan komitetni predsedateli Umarosman Hajiyewge söz beremen.
– Birinçiley, xoşgeldigiz barığız da,– dep başladı sözünU.Hajiyew. – Gazetge gelegenigiz birinçiley tügül, baş redaktornu da, munda işleygen qulluqçulanı da yaxşı tanıysız, hallaşıp işleysiz. Şolay işleygenigiz yaxşı. Suwu yoq özenden çığağanda, birew balaqların çüyürüp çığa bolğan. «Özende suwu yoq, neger çüyüresen?» – degende: «Bizin özenni biz sıylamasaq, kim sıylajaq»,– degen bolğan. Biz de bizin gazetibizge, teatrıbızğa, radiobuzğa, özge qurallarıbızğa özübüz hürmet etmesek, başğalar etmejek. Haribiz bizin peçat qurallanı işinde ortaqçılıq etip, özleni pikruların, oyların aytıp, tuwulunağan masʼalalanı arağa çığarmasaq, bizin uçun şo işni başğalar etmejek. Şo murat bulan bugün konferensiya da ötgerebiz. Milli gazetler nege tarıq, olarda ne masʼalalar göterilme gerek, hukumatdan ne kömek qarawullaybız, camyatdan ne kömek gerek... şulay wa özge masʼalalanı arağa salıp biz bugün bir pikruğa gelme tarıqbız. Komitetge qurşalğan 28 paçalıq peçat qural bar, şolanı 13-yü – milli gazetler wa curnallar. Milli peçat qurallar tarıq tügül, olağa nehaq xarj etile deygenler de yoluğa. Biz gazetler tarıqnı da aytma gerekbiz, olarda oxuwçunu tergewün tartağan maqalalar da çığarma gerekbiz, ullular da, cahiller de gazetni oxuyğan küyde etme gerekbiz. Geligiz, birçe işleyik, birigip işleyik, bugün gelgenigiz uçun da barakalla.
– Umarosman Haybullayewiçni pikrusun uzata turup, men bulay aytma süyemen,– dep uzatdı Kämil Aliyew, – gazetni masʼalası yañız paçalıqnı masʼalası tügül. Milletni özünü, camyatnı masʼalası da dür. Paçalıqnı aytsaq, 95 yıl alda bizin dağıstan paçalığıbız gazetler de bergen bizge, onu bulanğı özge masʼalalanı da çeçgen. Şo zamannı içinde gazetibiz çığıp da tura. Xarj yanından aytsam, şo yandan çeçilmegen bir masʼalası da yoq gazetni. Tek munda işleygenleni yaşawluq üyler bulan taʼmin etiwnü masʼalası da, özge masʼalalar da bar. Amma xarj yanından taʼmin etile. Camyatnı yanından ne yimik masʼalalar çeçilmey? Misal uçun, inqılapdan alda bizin gazet paçalıqnı yanından çığarılağan gazet bolmağan. Onu camyat özüne borç alıp çığarğan. Hali paçalıq özünü yanından çığarağanda, camyat çeçmey turağan masʼalalar bar. Muna, bu yılnı ekinçi yartısına yazılıw bitgen. Yazılağanlanı sanawu busa haran 5 miñge yetişe. Ötgen asrunu otuzunçu yıllarında busa tirajı 35 miñ bolğan. O zaman gazet sawlay Temirqazıq Kawkaznı xalqları uçun da çığa bolğan. Yañırtıp quruwnu dewürü başlanğança 15 miñ bolğan.
Tiraj şolay az bolğanğa gazetde işleygenleni de ayıbı da bardır. Tek camyatnı ayıbı da bar. Birdağı, kadr masʼalabız da arağa çığa. Bu, ozoqda, camyat çeçegen masʼalä tügül. Meni aslu taklifim komitetge, uniwersitetni filologya fakultetinde milli curnalistika bölük açılma gerek degen taklif edi. Şo taklif qabul etilgen dep aytıp bolmayman. Har gazet şo masʼalanı özünü güçü bulan çeçme gerek dey. Muna şu – xas pozisya. Biz redaksiyada şkola da açıp, şo masʼalanı çeçme gerekbiz. Tek şo qaydada şu masʼalä çeçilmey dep esime gele. Aslusu, biz sizge de tıñlama süyebiz. Munda gazetni süyegenler cıyılğanğa şeklik etmeymen. Sizin pikruğuz, takliflerigiz gerek.
Qorqmasqaladağı camyat sowetni predsedateli Racap Rajabow söyley:
– Munda salınağan masʼalä tüz salınğan. Men aytma süyemen, bizin camyat sowetni bir masʼalağa da qoşma süymeyler. Soñ da, bizin Xalq Cıyında 14 deputatıbız bar. Olar nege qoşulmay şulay masʼalalağa, men olağa soraw berme süyemen. Moskwada Camyat palatada bolduq, masʼalalanı göterdik, birew de yazmay şonu haqında. Munda rayon gazetni redaktoru da bar. Gazetdegi programmanı taydırıp, deputatlar etegen işleni haqında, camyat sowetler göteregen masʼalalanı haqında yazma gerek.
Babayurt rayondağı «Dawnu yaşları» degen camyat sowetni yolbaşçısı Waydulla Şayıbow söz aldı.
– Yazılıwğa baylawlu aytma süyemen. Bizin oxuwçulanı qurşayğan qaydalarıbız biraz osalmı eken dep oylayman. Bugün şu ullu cıyında, bizin sözübüz tutula busa, bizge de tıñlay busa, aldağı küyünde, administratiwno-komandnıy metod dep ayta edi şoğar, har rayonğa tapşuruw berip yazdırağan küy tarıq, plan salıp yazdırtma gerek gazetlege. Bizin milli gazet bolajaqmı, bolmajaqmı degen soraw salına bolğan soñ, şolay etmese bajarılmay. Har qurumdağı, wedomstwodağı hakim, hakimyatda işleygenler qoluna alma gerek şu masʼalanı, özlege borç etip.
İzberbaş şahardan gelgen, gazetni işinde aktiv küyde ortaqçılıq etegen Haci Hajiyew de söyledi.
– Yazılıw yürülegen waqti men şahardağı hakimleni, dalaplı adamlanı yanına baraman, gazetibizni haqında laqır etemen. Olar yazılabız, şo iş bolajaq dep söz bereler. Busa da köpler yazılmay qala. Bugün bu cıyında ahamyatlı masʼalä göterile. Bizin xalqğa gazet bek tarıq. 95 yıl ömür sürgen gazetde bizin milletni menmen deygen wakilleri işlegen, ortaqçılıq etgen, xalqnı qurşağan, bizge de yetişdirgen. Bugün busa gazetni qoldan çığarma yaramay. Birewler gazet de, kitaplar da tarıq tügül, İnternet bar dep aytsa da, şo tüz tügül, İnternetden oxusañ, sen yüregiñden çığarıp bolmaysan ondağı ahwalatlanı da, igitleni yaşawun da, tabiatnı suratlawnu da... unutulup qala. Artdağı on yılnı içinde gazetibiz köp maʼnalı masʼalalanı arağa çığara, bezendirilgen, har türlü temalanı da götere. Soñ da, curnalistni işi köp qıyın iş, men bilegen küyde, olağa tiyişli haq berilmey. Gazet toqtawsuz çığıp tura, onda işleygen qulluqçulanı işi de toqtawsuz yürüle, konweyerde yimik, olanı qıyının da tiyişli küyde qıymatlama gerek. Özünü tili bolmasa, gazeti, kitapları, teatrı bolmasa, şo millet yazıq millet dep oylayman.
Professor Abdulqadir Abdullatipow özünü oyların ayta turup bulay dedi:
– Gazetibizni can berip can alağan masʼalağa da aylandırıp, şoğar kömek de etip aylanmasaq, bizin qumuqluğubuz heç bolup qalar. Bir başlap gazet yabılar, soñ başğaları yabılar, şolaylıqda, barı da milli baylıqlarıbıznı tas etme bolabız. Gazet de, teatr da, curnallarıbız, radio, telewideniye de milletni yüzün görsetegen, bolmasa bolmayğan qurallar ekenni unutma tüşmey. Kim bulan laqır ete busaq da, şoğar inandırıp iş görmese yaramay. Dağıstandağı bir gazet de bizin qumuq masʼalalanı şulay terenden alıp, igitleribizni, zahmatçılarıbıznı, tarix, madanyat masʼalalarıbıznı görsetmejek qumuq gazetden qayrı. Nege tügül de, başğa gazetlege şo masʼalalar tarıq tügül. «Wremena» bulan da biz özübüznü milli oyubuznu, pikiribizni, masʼalalarıbıznı başğa milletlege de yetişdirip bolağanıq neçaqı da yaxşı. Gazetibiz enniden soñ da yaşama gerek, çıqma gerek.
Qarabudağgent rayon gazetni redaktoruMahammatmurat Kanzitdinow söz ala.
– Biz xalq bulan, muallimler, oxuwçular, ata-analar bulan osal işleybizdir dep esime gele. «Yoldaş» gazet de rayonlarda az bola dep oylayman, kwartalda bir sama gele tursa yaxşı. Yazılıwdan qayrı da, xalqnı qıyını-tınçı da bardır. Soñ munda deputatlanı haqında da söz çıqdı. Olağa tiyme yaramay dep biz tartınıp qalabız. Harisine kağızlar yazıp, ortaq işge qurşama gerek. Bizge Gazprom wa özge qurumlar yazılıwğa yaxşı kömek ete. Qumuq deputatlanı haqında da quru maqtap yazıp turma tüşmey, olar etegen mekenli işni de görsetme, olar bulan işleme gerek.
Dağıstannı xalq şairi Ahmat Caçayew de, özünü söylewünde qumuq xalqğa milli gazeti bek tarıq ekenni wa gazetni kömegi bulan köp türlü yaşawluq, madanyat, adabyat masʼalalar çeçilegenni ayta turup, bu cıyınğa bağışlap yazğan yañı şiʼrusun oxudu.
Birinçi respublika konferensiya tüşden soñ qumuq teatrnı binasında başlandı.
Yaraş Biydullayew.
Eldar Qoyçuyew çığarğan surat.
Aslu borç
milli maʼlümat qurallanı ösdürüw
3-nçü iülda Qumuq teatrnı binasında Dağıstannı milli maʼlümat qurallarını oxuwçularını, qarawçularını wa tıñlawçularını Birinçi konferensiyası ötgerildi. Konferensiyanı işinde respublikanı barı da şaharlarını wa rayonlarını delegatları, milli gazetleni oxuwçuları, telewideniyeni qarawçuları, radionu tıñlawçuları, maʼlümat qurallanı curnalistleri, yaratıwçuluq wa ilmu intelligensiyanı wakilleri, respublikanı camyat wakilleri ortaqçılıq etdi.
Dağıstan Respublikanı Prezidentini DR-ni Xalq Cıyınına Çaqırıw kağızında aytılağan küyde: «Biz özübüznü tarixibizni, kulturabıznı, xalqıbıznı yaxşı merdeşlerini xadirin bilme gerekbiz. Bizge dağıstan menligibizni yaqlama gerek: milli tilibizni, xalq awuz yaratıwçuluqnu, maqamlanı, biyiwleni, xalq giyimleni – barı da dağıstan oñaçalıqnı bekleşdiregenlikni, xalqnı ruhun görsetegenlikni saqlama tüşe.
Konferensiyanı aldında har milli gazetni redaksiyasında «dögerek stollanı» aylanasında pikru alışdırıwlar ötgerildi. Şolarda milli peçat quralnı ahamyatlı masʼalalarını haqında iç arada laqır boldu.
Milli maʼlümat qurallanı qısmatına bağışlanğan Birinçi konferensiyağa Qumuq teatrnı zalı qabul etip bolmayğan darajada adam bar edi. Xalqnı artıq cıyılmaqlığı yerleşdirmek uçun bir türlü qıyınlıqlar tuwdursa da, göterilgen masʼalä xalqnı haysız qoymağanı konferensiyada esgerildi.
Konferensiyanı yürütgen DR-ni Peçatğa wa başğa maʼlümat qurallağa qarayğan komitetini predsedateli Umarosman Hajiyew konferensiyada ortaqçılıq etgen Dağıstan Respublikanı paçalıq sekretarı Takibat Mahmutowağa söz berdi. T. Mahmutowa Birinçi respublika konferensiyanı oñarğanlanı wa ortaqçıların DR-ni Prezidentini atından haq yürekden qutladı.
– Bugün camyatnı wa paçalıqnı ösüwüne maʼlümat qurallar etegen taʼsirni aytıp bitdirme qıyın, – dep başladı ol sözün. – Maʼlümat qurallanı ortaqçılığı bolmay respublikada bir camyat-politika, yaşawluq-ekonomika, madanyat ösüw masʼalä da çeçilmey. Dağıstan camyatnı hakimlik qurumlanı harakatın yaqlayğanı-yaqlamayğanı aslu halda masʼalağa maʼlümat qurallanı yanaşıwundan hasil bola. Maʼlümat qurallar camyat arada pikru tuwdurağan ölçew bolup toqtağan. Ahwalatlanı malim etegen maʼlumatnı tüz beriw, göterilgen temanı mekenli ayan etiw, käsbu ustalıq wa Watanına süyüw – muna Dağıstannı curnalistlerinde biz görmege süyegen xasyatlar. Olanı köpleri şo talaplağa cawap da bere. Hisapğa alınğan maʼlümat quralları bulan bizin respublika Temirqazıq Kawkazda birinçi yerde. Maʼlümat qurallanı şo sanawun saqlama wa olanı ösüwünü hayın etme qast etejekbiz.
T.Mahmutowa konferensiya milli maʼlümat qurallanı aldındağı ahamyatlı masʼalalanı ayan etejekge, qurumlu ötejekge wa maʼlümat qurallağa oxuwçulanı tergewün birden-bir tartajaqğa baqdırılğanğa inanağanın bildirdi.
Peçatğa wa başğa maʼlümat qurallağa qarayğan komitetni predsedateli U.Hajiyewni dokladı gazetni «Wremena» bölügünde tolu küyde berile. Onda Dağıstannı maʼlümat qurallarını aldındağı borçlanı haqında aytıla. Şo masʼalalanı aslusu din ekstremizmge wa terrorçuluqğa qarşı turmaq dep hisaplana.
Taxo Godini atındağı ilmu-axtarıw institutnu direktoru Hamidullah Mahammatow özünü söylewünde köp milletleni arasında adamğa özünü oñaçalığın görsetegen birinçi belgi til masʼalä ekenni esgerdi.
– Şo sayalı milli tilleni masʼalalarına mekenli yanaşma gerek, – dedi ol. – Ana tilleni üyrenmek respublikanı «Bilim beriwnü haqında» degen zakonunda görsetilgen. Şo sayalı milli tillege ahamyatnı kemitme bir kasbuçunu da ixtiyarı yoq. Aldın yerli biz milli tillege laqır etilegen qural hisapda qaray edik busaq, hali milli tiller insannı ruh yaqdan ösüwüne taʼsir etegenni his etebiz. Dağıstanda köp tilleni barlığından tartınma tarıq tügül. Har millet özünü ana tilin göñüllü küyde üyrenme gerek. Onu bizge bir çinownik de, bir alim de üyretmejek. Biz bugün ana tilleni haqında ayta turup, camyatğa mekenli talaplar da salma gerekbiz. Ana tilleni üyreniwnü umumi bilim beriw ojaqlağa sallap qoysaq, millet köp zatnı tas etme bola. Ana tilni üyreniwnü ahlüden, ojaqdan başlama gerekni, ana tilni yaşlağa ata-ana üyretme gerekni masʼalası birinçi yerge salınma gerek dep hisap etemen.
Misal uçun, şahardağı oxuwçulağa da, yurt yerdegi oxuwçulağa da YEGE-ni beriwde bir yimik şartlar salmağa tarıq tügül. Yurt yerdegi yaşlanı ana tilge awunqu ekenin oylama gerek.
Ana tilin bilegen-bilmeygenlikden adamnı kultura darajasın bilme bola. Ana tilin bilmeygen adamnı ör kulturalı adamğa men, misal uçun, hisaplamayman.
Dağıstannı Curnalistlerini soyuzunu predsedateli, «Haqıqat» degen awar gazetni baş redaktoru Ali Kamalow aytğan küyde, bu konferensiyağa hazirlik görüwde biz oxuwçularıbıznı, olanı peçatğa baqğan yaqdağı süyüwün tolu küyde hisapğa almağanbız. Milli pressanı yoldaşları biz hisap etegen ölçewden de artıq bolğan eken.
– Dağıstanda peçat qural 1917-nçi yılda çıqma başlağan dep hisap etile. Dağıstannı peçat qurallarını kürçüsün salğan C.Qorqmasownu (onu atın zal tolğan xalq güçlü xars uruw bulan qarşıladı), Z.Batırmurzayewni, A.Akayewni, M.Mawrayewni, S.Qazbekownu, S.Habiyewni, H.Sayitownu wa başğalanı atların esgerme tüşe, – dedi A.Kamalow.
– Milli curnalistikanı bugüngü halını haqında aytsaq, hal yürek tındırarday tügül. Dağıstan paçalıq uniwersitetde 1989-nçu yılda curnalistleni hazirleygen bölük açılğan. Amma şo bölük hazirleygen kasbuçular milli peçatnı talaplarına cawap bermey. Olanı bir gruppası bulan laqırım boldu. Milli gazetlege işge gelme kim süye degen sorawğa cawaplanağan student bolmadı. Nege tügül, studentler yada ana tilin bilmey, yada ana tilindegi gazetde işlemekni uçuz göre. Telewideniyede işleme kim süye degen sorawğa studentleni barısı da qol göterdi. Şo sayalı milli gazetlerde usta yaş kasbuçular tarbiyalama qast etme gerekbiz.
Ol milli peçatnı ahamyatın göteregen masʼalalanı wa çaralanı oylaşmaqnı taklif etdi.
«Dagestan» degen telekompanyanı direktoru Aznawur Hajiyew özleni kompanyası milli berilişlege beregen ahamyatnı haqında aytıp söyledi.
– Har cuma milli tillege 40 minut zaman berile. Şo zamannı içinde respublikadağı politika, yaşawluq, madanyat, yurt xozäystwo hallar suratlana, telewideniyede türlü-türlü temalağa «dögerek stollar» ötgerile. Ahamyatlı masʼalalanı birisi hisapda telekanalda ör darajada hazirligi bulanğı milli qulluqçular yoqluğun esgerme yaray. Şo sayalı biz dağıstan tilleni ösüwüne paydalı taʼsir etegen şartlar yaratma süyebiz. Şo masʼalanı yaşlardan başlap, bara-bara terenleşdirme xıyalıbız bar.
Ağaçawul orta şkolanı direktoru Cuwayriyat Qambolatowa:
– Ana tilin tas etgen xalq özünü milli madanyatın, özün tas ete. Şoğar göre de haligi şartlarda telewideniye de yaşörümleni, yaşlanı tergewün tartağan berilişler yaratma gerek, milli tillerde qujurlu radioberilişler bolma gerek. Haligi şartlarda özünü maʼlümat oñaçalığın tapmağan xalq tarixni ösüwünden artda qalajaq. Maʼlümat qurallar camyat aradağı masʼalalanı basıltıp da, örçütüp de bola.
Bizin «Yoldaş» gazetni yaratıwçu kollektiwi maʼlümat quralın bir neçe känzi örge göterip, xalqnı arasında gazetni aburun artdırma bajardı. Gazet maʼlümat qural bolup qalmay, tarix yaqdan bilim beregen muallim hisapda da arağa çıqdı. Gazetni betlerinden xalq özünü unutula barağan igitlerini haqında, ahwalatlanı haqında maʼlümat ala, – dedi.
Yaşörümleni qurumunu atından konferensiyada Absalütdin Hamzatow bulay aytdı:
– Yaşörümleni arasında hali de milli tillege tergew osal bolağanına talçığağanları bar. Bizin yaşörümleni qurumu ana tilleni yaşlağa üyretmekni proyektini üstünde işley. Onda biz ana tilleni yaşlağa üyretmekni har ahlüge borç etip salabız. Masʼalanı şolay salmasa, milletler özleni tillerin az zamannı içinde unutma wa tas etme bola. Bizin proyektibiz bu yılnı noyabr ayına hazir bolur dep esibizge gele.
Kaçar Hüseynayewa – «İlçi» gazetni baş redaktoru:
– Xalqnı barı da tarixi tilde saqlana. Dağıstannı tilleri miñ yıllar bulan özleni öztöreçe alamatların saqlap turğan. Bugüngü yaşlar busa ana tilibizde söylep bolmaybız dep aytalar. Paçalıqnı yanından yaqlaw bolsa, tilleribizni saqlama hali de imkanlıq bar. Şo imkanlıqlanı da paçalıq halige yaratıp tura, milli maʼlümat qurallanı yaqlay. Xalqnı daimligi onu tiline asaslana, milletini wakillerini haqılına, bajarıwluğuna asaslana. Özünü öz tilin satğan xalq neni de satma bolur, – dedi.
Danyal Mahdiyew – Kurkli orta şkolanı direktoru:
– Dağıstan xalqlanı tilleri har milletni milli ruhun suratlay, tarixin, adatların görsete. Bizge tilleribizni unutma yaramay. Til insanğa yaşdan berile. Şo sayalı, yurt şkolalanı çı aytma da aytmayman, şahar şkolalarda da milli tilleni kabinetlerin açmağa gerek. Tilleni üstdensuw tügül, mekenli üyrenme tarıq. Yazıwçulanı soyuzu, har şkolağa özleni wakillerin yiberip, olar yaşlağa ana tilinde asarların oxusa, türlü çaralar ötgerse yaxşı edi.
Hamit Buçayew – Xalq xozäystwo institutnu prezidenti:
– Bizin ülkede adamğa özünü muradına yetişmek uçun barı da imkanlıqlar boldurulğan. Bizin respublikada da hal şolay. Busa da yaşörümler şo imkanlıqlardan paydalanma bajarmay, qıynalma süymey. Dağıstanlı biznesmen Suleyman Kerimow köp ullu planlanı göz alğa tutğan. Qorqmasqalanı qırıyında ullu zawod qurula, Groznıydağı üylerden kem tügül üyler, ullu predpriyatiyeler, zawodlar qurula. Bizin institutdağı yaşlanı başına işleme yaratılağan şo imkanlıqlanı siñdirip, oxuwğa iştahlığın göterme qast etebiz.
Mahammatrasul Rasulow – Dağıstan kitap izdatelstwonu direktoru, Dağıstannı xalq yazıwçusu:
– Üyde yaşlarıbız ana tilibizde söyleymi? Qayta ata-ana yaşları bulan özler orusça söyley. Yaşlar bawundan başlap, oramda, soñ şkolada, ör oxuw ojaqda, işinde orus til qollana. Şo sayalı özleni taʼsiri bardan paydalanıp, ata-ana yaşlağa ana tilin üyrete turma, olar bulan ana tilinde söyley turma tarıq.
Bizin respublikada yimik milli tillerde köp kitap çığarılağan respublika yoq. Bugüngü konferensiya da ana tillege berilegen ahamyatnı artdırmaqnı talap ete. Nege Prezident, Peçatğa qarayğan komitet ana tilleni hayın etme gerek. Biz özübüz onu hayın etmesek, örden gelegen bir qarar da tilleni saqlama kömek etmes.
Patimat Abukowa – Xasawürt pedkollejni dars beriwçüsü:
– Xasawürt pedkollejde ana tilden dars berip işleygenim 65 yıl bola. Art waqtilerde ana tillege baqğan yaqdağı haysızlıqnı añlamayman. Awletni anası bir bolağanda yimik, tili de bir bola. Şu tribunadan taba ata-analağa tileme süyemen: yaşlarığızğa ana tiligizni üyretigiz!
Peçatğa, başğa maʼlümat qurallağa qarayğan komitetni predsedateli U.Hajiyew ayan etgen, ör qurumlağa baqdırılğan taklifleni konferensiyanı ortaqçıları qabul etdi.
Konferensiyanı axırında peçat qurallar bulan köp yıllar baylawluq wa yaratıwçuluq aralıqlar yürütgen milli gazetleni bir-bir oxuwçularına sawğatlar tapşuruldu, olanı arasında «Yoldaş» gazetni tezgi yoldaşı Amir Aliyew de bar.
A.Hamzayew