Men Xasawürtğa barsam, "Qumuq tüz" gazetni redaktoru Raşit Harunownu yanına girmey qalmayman.
Bu gezik men Raşitni stolnu artında oylu olturup tapdım. Tolu küyde soraşıp da bitgençe, ol mağa bir kağızlanı uzatdı. Olarda yazılğanğa göre, "Drujba" degen gazetni baş redaktoru M. Şayıxmahammatow "Qumuq tüz" gazetni baş redaktoru Raşit Harunownu işinden taydıra.
- Başğa gazetni baş redaktoru seni işden taydırma neçik bola? — dep sorayman Raşitge.
- Şahardağı awar, qumuq, orus tillerde çığağan üç gazetni uçrediteli şahar administrasya eki yıl aldın özünü qararı bulan bergen oğar şo ixtiyarlanı. Şo qararğa göre men Şayıxmahammatownu zamestiteli bolmağa gerek edim. Eki yılnı uzağında men şoğar bolğan küyümde qarşı turdum.
- Hali ne etejeksen? Sudğa beremisen?
- Toqtaşıp bitmegenmen. Bir yaqdan, boş awaralağa zamanımnı yiberme tarıqmı dep oylaşaman. Ozoqda, bizde adilli sud bolhan busa, şolay oylaşmajağıdım. Ondan qayrı, men özüm de meni işden şu küyde taydırajaqğa hazir edim. "Qumuq tüznü" xarlısızlığı, erkinligi uçun men barı da bolağanımnı etdim. Qumuq gazetge başğa milletni adamı yolbaşçılıq etegenine men razi tügülmen. Xalqnı aldında namusum taza. 21 yıl aldın şu gazet açılağanda, redaktor bolup gel dep, Qumuq xalq harakatını aktiwi çaqırğanda gelgenmen. Şo waqtini içinde yerli hakimlege yuwuq bolaman dep aylanmağanman, har zaman da qumuq xalqnı paydasına işleme qarağanman. Barakalla uçun tügül, özüm dağı küyde bolmayğanıma göre. İşden tayağanıma talçıqmayman. Şu awur yük, namus yelkemden tüşgenge şat da dürmen. Ne zat yaman tiye dep soray busañ, aytayım: şu işge meni qumuqlar salğan edi, hali başğa milletni adamı taydıra. Hali özüñ hasil çığar.
"Yoldaş", 16.09.2011 g.