Biz örde esgergen isbatlı, yarıq şo eki de söz bulan Dağıstan radio watandaşlarıbıznı üylerine girip, ertenler yüreklerin açağanlı, axşamlar göñün alağanlı 80 yıl tamamlandı.
Şo quwançlı ahwalatğa bağışlanıp, Mahaçqaladağı M.Gorkiyni atındağı teatrnı zalında şatlı cıyın ötgerilejek.
Dağıstanda yañı yaşaw quruwda, respublikanı ekonomikasın, kulturasın ösdürüwde, yaş naslunu tarbiyalawda barı da milli tillerde berilişler yürütegen Dağıstan radio bek ullu wa ahamyatlı rol oynağan wa hali de oynay.
Dağıstanlılanı erkinligin, olanı madanyatını darajasın görsetegen bir belgi bar busa, şo da respublikanı milli tillerinde yürülegen radioberilişlege tıñlamağa bolağanlıqdır. Dağıstan radionu qulluqçuları türlü-türlü dewürlerde çalışğan, yaşawnu tarmaqların ösdürüwde aktiv küyde ortaqçılıq etgen, Ullu Watan dawnu yıllarında frontğa getgen, onda qoççaqlıqlar görsetgen.
Gertiden de, Dağıstan radionu milli redaksiyaları, olanı içinde qumuq tilde berilişler yürütegen redaksiya da, maqtawlu yolnu ötgen. Dağıstan radionu qumuq redaksiyasını işi haqında özünü sıylı yübileyini aldında bugün bir neçe söz aytmağa süyemen.
Qumuq radionu yübileyi haqında söz yürülegende, onu tarixin qısğaça gözden geçirmekni orawlu gördüm.
Dawdan aldağı yıllarda da, dawnu yıllarında da Dağıstan radionu qumuq redaksiyasında köp belgili adamlar işlegen. Olanı arasında biz ayrıça esgermege süyegenlerden starşiy redaktor Abuzahir Batırow, politredaktor Zyawutdin Dayibow, tarjumaçı Wahit Dıdımow, redaktor Basir Mustapayew wa özgeleri bar.
Dawdan soñğu yıllarda türlü-türlü qulluqlarda Cambolat Bekmurzayew, Abdulxalıq Xabilow, Rasul Rasulow işlegen. Şo zamanğı "Dağıstan" degen teleradiokomitetni predsedateli bolup Dağıstannı xalq şairi Anwar Hajiyew çalışdı.
Qumuq redaksiyada köp yıllar Dağıstannı xalq şairi Atqay Hajamatow işledi.
Geçgi yıllarda Dağıstan radionu qumuq redaksiyasında Şarip Alberiyew, Mahammatsayit Malikow, Qurmanali Şamsutdinow, İbrahim Şabayew, İbrahim İbrahimow, Aynutdin Mamayew, Abdulhamit Tatamow wa özgeleri işlegenler.
Milletlege göre redaksiyalar qurulğanda, qumuq tilde berilişler yürütegen baş redaksiyanı baş redaktoru bolup birinçiley Burhan Bammatow işlegen. Ondan soñ şo qulluqda Salih Waliüllayew, Sirajutdin Toqbolatow, Nasrulla Cabuyew yoldaşlar çalışğan.
Dağıstan radionu qumuq redaksiyasında türlü-türlü yıllarda şair Absalam Askerxanow, yazıwçu Mustapa Hüseynow, şair wa kompozitor Payzurahman Mantayew de köp iş etgen.
Dağıstan radionu qumuq redaksiyasında işlegen birdağı birewnü haqında ayrıça aytmağa tüşe. Onu qısmatı Dağıstan radionu qısmatı bulan tığıs küyde baylawlu. Biz özünü haqında aytmağa süyegen adam — Galina Camalutdinowna Bekbolatowa. RF-ni madanyatını at qazanğan qulluqçusu Galina Camalutdinowna Dağıstan radionu qumuq redaksiyasını ör kategoryalı diktoru bolup 60 yıldan da qolay işlegen. Ol köp yıllar wa namuslu küyde işlegeni sayalı Ginnessni kitabına — planetanı rekordlarını kitabına yazılğan. Ol "İnterstroñ" degen dünyanı rekordsmenlerini klubunu diplomuna wa medalına yes bolğan. Galina Camalutdinowna bugün pensiyada busa da, qumuq redaksiya bulanğı aralığın üzmey.
1990-nçı yıldan 2006-nçı yılnı awgust ayına yerli qumuq redaksiyanı starşiy redaktorunu qulluğunda Dağıstannı inçe sanyatını at qazanğan çalışıwçusu Zubayıl Xyasow da işledi. Belgili bolğanı yimik, ol 2006-nçı yılnı awgust ayında milisyanı xas operasyası ötgerilegen waqtide geçindi.
Özünü yaşawunu artdağı 35 yıl ömürün redaksiyanı muxbirini qulluğunda Soltanbek Soltanbekow da yibergen. Ol şo waqtini içinde yaxşı iş de görsetgen. Respublikanı aldınlı adamlarını haqında yazğan maqalaları, oçerkleri, reportajları sayalı oğar "DR-ni madanyatını at qazanğan qulluqçusu" degen hürmetli at berilgen. Ol curnalistleni "Altın qalamına", Dağıstannı xalq şairi Anwar Hajiyewni atındağı sawğatğa da yes bolğan. Pensiyağa çıqsa da, Soltanbek Soltanbekow bugün de redaksiya bulan tığıs aralıq yürüte.
Artdağı yıllarda ülkede yürülegen reformalanı natijasında Dağıstan radio, onu milli tillerde berilişler yürütegen redaksiyaları da köp ullu çetimliklege tarıdı. Berilişleni zamanı kemitildi, milli redaksiyalarda işleygenleni sanawu kemidi.
İşde yoluğağan qıyınlıqlağa da qaramaylı, berilişler, programmalar qujurlu wa maʼnalı bolsun uçun qumuq redaksiyanı qulluqçuları Patimat Ağarahimowa, İsa Ahmatow, Gülbağdat Omarowa, redaksiyanı zwukorejissöru, DR-ni madanyatını at qazanğan qulluqçusu Umalat Musalayew qayratlı küyde çalışalar. Qıyınlıqlar uzaq qalmaylı tayar, Dağıstan radio da camyatıbızda özünü aburlu yerin tabar dep umut etebiz.
Bugün biz qumuq radionu redaksiyasına har zaman öz qoşumun etegen muxbirleribiz Alibek Salawatownu, Nabiülla Mahammatownu, Abdulwahit Salawatownu atların köp süyüp esgerebiz.
Dağıstan radionu 80 yıllıq yübileyini gününde qumuq redaksiyanı ösüwüne boluşluq etgen RF-ni xalq artistkası Burliyat İbrahimowanı, RF-ni at qazanğan artistkası Burliyat Elmurzayewanı, Dağıstannı xalq artisti Mahammatzapir Bahawutdinownu, şolay da belgili kompozitorlar Askerxan Askerxanownu, Xizri Batırgişiyewni, Bammatxan Adilxanownu, redaksiya bulan aralıq yürütegen yazıwçularıbız, şairleribiz Kämal Abukownu, Mahammat Atabayewni, Badrutdin Mahammatownu, Ahmat Caçayewni, Zuleyxa Atagişiyewanı wa olar bulan yanaşa köp-köp özgeleni atların esgermey bolmayman.
Bugün iş yoldaşlarıma wa barı da radiotıñlawçulağa, Dağıstan radionu 80 yıllıq yübileyi bulan haq yürekden qutlay turup, olağa qattı sawluq, uzaq ömür, işde üstünlükler yorayman.
Opublikowano: gazeta "Yoldaş", 14.12.2007