Aldağı dewürlerde Belgiyanı taxşaharı Brüsselge yuwuq yerde bir qumuq camyatı, özlege geç gelgenni qondurup, aç gelgenni toydurup bir-birinden quwanıp, qız berip, qız alıp, ulanlarına toy etip, yıraqlardağı Ana elinden, Ata yurtundan oy etip, dosluqda-tatıwluqda yaşay degen busa inanıp da bitmes edik. Amma hali endi inanmay neçik bolarsan, eger de bu haq gerti zat busa.
Aprel aynı 8-nde bütün "Awrupalı" qumuqlar cıyılıp Günbatış Yewropanı Qumuq yurtu — MOLDA (bu haqda biz gazetibizde alda yazğan edik) esgi yuwuğubuz Zafer Özdenni ojağında ullu toy yaxşılığı bolğan. Ol ulanı Çiñizni bir gözel qumuq qızı Sibel bulan üylendirgen. Toyğa bir cuma alda har türlü ülkelerden qonaqlar gele başlap, süyünçler bulan tolu gözel günler geçirgenler. Toyğa, gertiden de, kep xalq cıyılğan bolğan, haqıqatğa Zafer yuwuğubnu ulanı Çiñizni toyu Yewropa qumuqluğunu ullu bayramına aylanğan. Toyğa gelgenler bir cuma uzağı bir-birinden süyünüp, bir-biri bulan dertleşip, bir-birinden ayrılıp bolmay da turğanlar. Ne güçdür dağı watanından tışda bu adamlanı bir-birinden ayrılma qoymayğan, bir-birine üzülmesdey baylayğan? — O güçnü atı belgili — o qumuqluq.
Bu "buzulup" barağan qumuq toynu yesileri wa ortaqçıları özleni bu yıbançlı mühleti — "bir günü, bu günü bizden getemesin, bu günnü süymeygenler muradına yetmesin!" dep alğış etegendey esdelikge ortaq surat da aldırğanlar. Kompüterimde faylnı açıp bu renkli suratğa qarayman, onda yüzge yuwuq adam, yüz kelpet bar. Suqlanasan, ne gözel yüzlü adamlardır olar, ergişisi, qatını-qızı bulan. Sizde bir bağığız, olanı hasiret gözlerinden taba, baliki de, Tarğudan, Endireyden, Qazanışdan, Qumuqdan, Cüñütey bulan Yaxsaydan, Ötemiş bulan Qarabudaqgentden XIX-nçu yuzyılnı oratalarnıda wa ondan soñ muhacir bolup yat ellege (gurbetlege) özlege nasip izley, yaşawluq izley getgen olanı ata-babaları bizge hasiret bağadır.
Toynu yesisi Zafer toyğa çaqırılğandan ese, bir-neçe keren artıq qonaqlar gelip, harisine tiyişli küyde teregew-sıy etip bolmağanmandır dep qıynala:
Toynu xabarı yetgendoq, yuwuğum Zaferge men internetden taba bulay qutlaw kağız yiberdim:
- Assalamu aleykum, Zafer-qardaşım!
Salamlar bolsun seni bulan birge bütün Qumuq yurtu — Molğa.
Yavu.net\'de oxup añladım yaxşılığığız bolajaqnı. Allah yaxşı sahatın qarşı etsin! Ulanın üylendirmek ullu nasip, ullu şatlıq. Bolğan yaxşılığız uzağından bolsun. Yaşlar tüzelip-oñup yaşasınlar, ulanlı-qızlı bolsunlar!
Haq yürekden qutlayman wa yaxşılıqlar yorayman. Bolğan soñ toylar bolsun, qumuqlarıbız har daimde yaxşılıqlarda yoluqsunlar. Bilgen busam, yuwuqda bolğan busam, toyuğuzğa men de yetişip geler edim.
Essen-aman turuğuzz!
Sizge hamanda yaxşılıq yorayğan — Kämil ALİYEW
Şo gününde internetpoçtabız cawap da geltirdi. Onda bulay aytıla:
Bek ayavlu Kamil,
Barigiz da sav boluguz, baribiz da esen aman bolayik da kop toylar eteyik bulay.
Bilemen, ulan uylendirmek, namusu bulan gizyas yolcu etmek Ullu satlik.
Olani yaginna bir ullu satlik da yuvuk-uzak demeden Danimarka, Almanya, Fransa, Hollanda, Turkiya\'den bari da "YAVU"yurtlulani birce, munna ciyilmalaridi.
Aytganlaring bek suyundurdu meni, seni ozung gelgencagi boldu, savbol. Saga bir surat yiberemen, barisi da Gumuk taptazza, Yoldasga beripbolursan. Bari da Kumuk yurtuna selam dep aytarsan, barigiz da esen aman turuguz.
Zafer OZDEN.
- Bek ayawlu Kamil!
Barığız da saw boluğuz, barıbız da esen-aman bolayıq da köp toylar eteyik bulay.
Bilemen, ulan üylendirmek, namusu bulan qızyaşnı yolçu etmek ullu şatlıq.
Olanı yağınna bir ullu şatlıqda yuwuq-uzaq demeden Danyadan, Albanyadan, Fransiyadan, Gollandiyadan, Türkiyadan barı da "Yawu"-yurtlulanı birçe munda cıyılmalarıdı.
Qutlawlarıñ (aytğanlarıñ) meni bek süyündürdü, sen özüñ toyğa gelgençağı boldum, sawbol. Sağa bir surat yiberemen, barısı da Qumuqlar tap-taza, "Yoldaşğa" berip bolursan. Barı da Qumuq yurtğa (elge) salam dep aytarsan, barığız da esen-aman turuğuz!
Zafer ÖZDEN
... Muna, geresiz, şulay zamanlar. Bolğan soñ toylar bolsun! Qumuqluq sönmesin!
Opublikowano: Gazeta "Yoldaş"