Dağıstanda txekwondo yabuşuw arağa çıqğanlı 15 yıllar bolup tura. Şo yıllanı içinde bu güntuwuş yabuşuwda bizin qumuq yaşlar yetişgen üstünlükleni haqında aytma süyemen.
Mahammat Abdullayew, Ruslan Byarslanow
Bozigit Zakaryayew, İmyamin Canbekow
Trenerleni arasında iñ de aytılğanı — Rossiyanı at qazanğan treneri Mahammat Abdullayew (ata-babaları töbenqazanışlılar). Mahammat Dağıstannı cıyım komandasını baş treneri de dür. Ol üyretgen yaşlar Yewropanı, Rossiyanı çempionları bolğan. Trener iş bulan onu inisi Ruslan Mahammatow da maşğul.
Txekwondo federasyanı wise-prezidenti Ruslan Byarslanow — qumuq ulan. Ol — respublikada şo curanı yayılıwuna sportsmenlege, trenerlege kömek etegenleni birisi. Federasyanı atından ol barı da yarışlağa barıp, bizin yabuşuwçulanı yaqlay, Dağıstandağı barı da çempionlağa Ruslannı kömegi tiygen. Federasyanı aslu işin ol yürüte desek tüz bolur.
Hali txekwondo yabuşuwda bizin çempionlanı haqında söyleyik.
Bozigit Zakaryayew — Yewropanı wa Rossiyanı çempionu.
Rossiyanı çempionu degen atnı İmyamin Canbekow da alğan.
Şamil Tağayew — Rossiyanı dört keren çempionu. Studentleni arasında dünyanı çempionatında bronza medal alğan.
Abdul Camalow Dağıstannı da bir neçe keren çempionu bolğan.
Kämal wa Arsen Byarslanowlar
Kämal Byarslanow — Ruslannı (wise-prezident) ulanı, Rossiyanı eki keren çempionu, Yewropa ölçewlerde sawğatlı yerge yes bolğan. Onu inisi Arsen — Dağıstannı wa Rossiyanı çempionu. Tamerlan Aqawow Rossiyanı üç keren çempionu bolğan. Yewropa çempionatlarda eki keren sawğatlı yerleni qazanğan.