Getgen cumanı başında A-P. Salawatownu atındağı Qumuq muzıkalı-drama teatrnı binasında belgili yırawubuz, ötgen asruda milli madanyatıbıznı ösüwüne ullu qoşum etgen Tatam Muratow tuwğanlı 110 yıl bitegenlikge baylawlu şatlı cıyın ötgerildi. Tüzü, zalğa girgendoq, yer-yerde olturğan 50-60-ha yuwuq qarawçunu görüp göñüm buzuldu. Xalq bu ahwalatnı haqında çağında bilgen busa, zal adamdan tolup bolajağına şeklenmeymen. Şo Madanyat ministerligini qulluqçularını yanından yiberilgen ullu kemçilik. Erewüllü, pahmulu adamlarıbızğa şulay yanaşıw oşamay.
Dağıstannı milli soğuw muzıka alatlarını orkestrı Tatam Muratownu maqamların soğup cıyın açıldı. Özünü söylewünde Qumuq teatrnı çeber yolbaşçısı Aygum Aygumow Tatam Muratownu yaxşı tanığanın wa olanı ahlüsü bulan tığıs qurdaşlıq aralıqlar yürütgenin esgere turup, yıraw hisapda, kompozitor, rejissör, aktör hisapda Tatam Muratow bizin madanyatıbızğa etgen qoşumnu, onu har ne yaqdan da pahmuluğu, qurumçuluq bajarıwluğu bolğannı haqında aytdı. Dağıstannı Kompozitorlarını soyuzunu predsedateli Ramazan Fataliyew de özünü söylewünde Tatam Muratownu yaratıwçuluğunu haqında, xalq maqamlarına aylanıp qalğan küyler bulan ol madanyat tarmaqda etgen ullu qoşumunu haqında xabarladı. Tatamnı ulanı Şarabutdin (Aleksandr) Muratow da atası bulan bolğan ahwalatlanı haqında esgere turup, onu unutmay 110 yıllığın belgileygen Madanyat ministerligini qulluqçularşa, zalda cıyılğanlağa özünü raziligin wa barakallasın bildirdi.
Söylewleni aralaşdıra turup bizin belgili, atı aytılğan yırawlarıbız Zaynap Absamatowa, Zoya Çunayewa, Asiyat Kumratowa, Gülxanım Hajiyewa, İrada Aswarowa, Burliyat Mahammatowa, Eldarxan Kazimow wa özgeleri Muratownu yırların yırlap qarawçulanı raziligin qazandı.
Bizin muxbiribiz.