Şairni pasihligi ol tuwğan yerden, elden-yurtdan amalğa geledir degen oy bulan tolu küyde razi bolmasam da, qarşılığım da yoq: urluqnu özegi saw busa, o eki taşnı arasında qalsa da tamur yiberejek.
Özekli urluqğa parx beregen pahmulu şairibiz Musa Şixawow Köstekde tuwğan. "Köstek" desek, bizin göz aldıbızğa özünü teñi yeq darajadağı ullu şairibiz Anwar gelip toqtay. Musanı yaratıwçuluq oʼsüwünde özge şairlerden ese oğar, ozoqda, Anwar bek taʼsir etgendir. Amma onu poezyasında xalq awuz yaratıwçuluğundan, Yırçı Qazaqdan gelegen yıltınlar da yoluğa.
Bugünlerde qumuq oxuwçu Musa Şixawownu biz köpden berli gözleygen yañı kitabın alajak. "Tañ sahatnı sırların" oxuyğanda, redaktor hisapda tügül, oxuwçu hisapda, şair hisapda hali bolğunça özüm yazğan şiʼrularımdan göñüm çıqdı, "muna bulay da yazıp bolağanlar bar eken!" — dep yahlanıp, şairlik çüylerimni yañıdan burup küyledim.
Oxuwçuğa, bizin qumuq wa dağıstan adabyatğa süyünçü ayta turup, Musanı şo kitabından bir-eki şiʼrunu "Yeldaşdan" taba bermekni tilegende, redaksiya bek ariw gördü.
Badrutdin
* * *