Mahaçqalanı "Epoxa" degen kitap çığarağan üyünde "Yoldaş" gazetni politika bölügünü redaktoru, Rossiya Federasyanı wa Dağıstan Respublikanı madaniyatını at qazanğan qulluqçusu, belgili jurnalist Abdulhamit Miçigişewni "Yaşaw masʼalälar: elibizni, xalqıbıznı qısmatı" degen kitabı çıqdı. 300 tirajlı, 300 beti bulanğı bu kitapda sınawlu jurnalistni şo esgerilgen rubrikanı tübünde qumuq xalqnı belgili adamları bulan 2000-nçi yılnı fevral ayından 2001-nçi yılnı mart ayına yerli bolğan wa "Yoldaş" gazetde çıqğan laqırlaşıwları yerleşdirilgen.
Awtornu aslu ideyası — men hisap etegen küyde, camiyat wa politika çalışıwçularıbıznı, alimleribizni, intelligensiyabıznı wakillerini, bajarıwlu adamlarıbıznı tilinden qumuq xalqnı bugüngü halın isbat etmek wa çetim yaşaw hallardan çıqmaq uçun qollama gerek yollanı görsetmek.
Özler bulan laqır yürülgen barı da degenley wakilleribiz topuraq, yurt xozäystwo, kultura, yaşawluq, til masʼalälarda özünü topurağında az milletge aylanğan qumuq xalq qıyıqsıtıwlağa tarığannı isbatlay. Şo masʼalälanı çeçmek uçun, köp känt etmey, har adam özü saylağan tarmaqda harakatçılıq görsetmek, oxuwda, ilmuda, işde bolğan çaqı ör darajağa yetme qast etmek, har ne masʼalänı zakon yolunda çeçme qaramaq degen pikru berile. Hasilikalam, milletni türleniwü har adamnı özünden başlanma gerek.
İñ de haqıllı, bay sınawu bulanğı adamlarıbıznı yaşaw darsı ullulağa da, yaşlağa da paydalı bolajaqğa inanabız.
Tek laqırlaşıw yürülegen zamanda ahamiyatlı bolğan, zaman gete turup, şo ahamiyatlığın tas etgen bir, eki sorawnu materiallanı kitapğa hazirleygende awtor tüşürgen busa, dağı da yaxşı bolur edi dep oylayman.
Haligi çontuq til bulan yazılğan, içi yañılışdan tolğan kitaplar çığarılağan zamanda, ana tilin yaxşı bilegen, muqayatlı oy qurup bolağan sınawlu jurnalist Abdulhamit Miçigişewni kitabın oxup lezzet alasan.
A.HAMZAYEW.