Toqsan teriden ton giygen,
Toğuz teriden börk giygen,
Toğaylarda at oynatma tüşgende,
Toğaslanı toza gelgen "Yoldaşım",
Deñiziñde dewrük yeller eşgende,
Yelkenleriñ yaza gelgen "Yoldaşım",
Miyibizni iritegen yallaw gün
Üstübüzge aq bulutday yabulduñ.
Şayıxlağa bolduñ halal namazlıq,
Şairlege şaqı bolup tabulduñ.
Tamurumda hasiretlik qaynatıp,
Yüregimni çıraq etip yaqğansan.
Tör yanıñda meni canım oynatıp,
Toyum bolsa, tör yanıma çıqğansan,
Yalğan dünya yawyüregim yarğanda,
Emçi bolduñ, bolduñ mağa yaraçı.
Süygenime men baş ura barğanda,
Süyüwüme bolduñ halal araçı.
Bir darsıñda özdenlikge üyrenip,
Bir darsıñda gözellikni geçgenmen.
Süt tatıyğan ana tilni bulağı,
Suwsağanda, gelip senden içgenmen.
Sınawlu gün yolda qoymas "Yoldaşım",
Sağınğanda sır çeçegen sırdaşım,
Tolpanlardan, taşğınlardan ötgensen,
Toqsanınçı köpürüñe yetgensen.
Yoluñ uzat, awuruñ men alayım,
Arqalığın almaz tañlar boyağan,
İnbaşların inamlıqğa tayağan,
Şo köpürnü bir tirewü bolayım.