Xalq özüne de, pahmusuna da bazağan, barıbıznı da süyümlü yırawubuz, Dağıstannı at qazanğan artistkası Zoya Çunayewa har yıl degenley «Soğul, arğanım» deygen arğançılanı festiwalında ortaqçılıq etip, ondan qazanğan üstünlükleri bulan bizin xalqıbıznı süyündürüp tura.
Hali-halilerde ol İwanowo şaharda ötgerilgen 10-nçu Bütünrossiya festivalda ortaqçılıq etip, onu laureatı bolup qaytğan. Bu gezik şo festivalda tış paçalıqlardan: Germanyadan, Rumınyadan, İzrailden, Ukrainadan gelgenler de özleni pahmusun görsetgen. 10-nçu festivalnı iyün aynı 9-ndan 13-ne yerli yürülgen gala-konsertde Z.Çunayewa Anwar Haciewni sözlerine göre yazılğan «Almalı bawlar» degen yırnı yırlap, qarawçulanı birdağı da ruhlandırğan.
Şo günler İwanowo şaharda arğanğa esdelik taş açılğan. Festivalda 600 adam ortaqçılıq etgen. Rumınyadan gelgen qonaqlanı arasından birisi, Zoyanı bek aburlap: «Men sizin televizordan görüp, tanış bolmağa bek hasiret edim. Şo muradıma yetişgenge bugün ayrıça şatman», – dep, onu yırlayğan küyüne raziligin bildirgen.
Soñ dağı da, Zoyanı ondağı qarawçular da ullu hürmet bulan qabul etgenler. Nijegorodsk telewideniyesini jurnalisti Zoyanı haqında «Yüreginde arğan soğula» degen beriliş etmek uçun, onu bulan laqır etip, wideoğa yazıp alğanlar. Xalqnı yaratıwçuluğuna amin bolup, onu aldında baş iyegeni, berilişde ortaqçılıq etgeni uçun Z.Çunayewağa Nijegorodsk telewideniyeni atından barakalla berilgen.
Har yıl festivalnı yürütegen Anastasya Zawolokina Zoya Çunayewanı yuwuq adamı yimik görüp, oğar ayrıça, özünü yanından da sawğat etgen. Zoyanı bu üstünlügü bulan biz de haq yürekden qutlaybız.
P. HAYBULLAYEWA.