Zubayıl Xyasownu gömegende ötgerilgen qayğılı mitiñden
Bu yılnı awgust ayını 25-nde belgili rejissör, jurnalist, Dağıstan Respublikanı inçe saniyatını at qazanğan çalışıwçusu Zubayıl Canbekowiç Xyasow heç gözlenmegen küyde harasat hallanı qurbanı bolup can berdi.
Artındağı gün Xyasow, sayki, terrorçular bulan bir til bolğan degen informasya qurallarda geçgen tergelmegen yalğan xabarlanı geri urmaq wa şolağa qarşılıq görsetmek uçun Qumuq teatrnı ullu zalına köp xalq özlügünden cıyıldı.
Awgust aynı 31-nde Zubayıl Xyasow qaburğa barıp, canı paraxat boldu.
Onu Mahaçqalanı qırıyında yerleşgen qumuq yurt Ağaçawulnu qaburlarında köp xalq cıyılıp Haqğa tapşurdular. Qaqaşura yurtnu qadisi etgen dualardan soñ cıyılğanlar alham etdiler.
Qayğılı mitiñni, bu günlerde Zubayılnı menlik atın yala yabuwlardan yaqlap xıylı çalışğan, xıylı harakat etgen onu yurtlusu, belgili paçalıq wa camiyat çalışıwçu Umalat Nasrutdinow açdı.
Qumuq teatrnı çeber yolbaşçısı Aygumow, GTRK-nı yolbaşçısı Xawçayew, «Teñlik» harakatını yolbaşçısı Salaw Aliyew, Qarabudaqgent rayon administrasyanı başçısını zamestiteli Ağalaw Halimow, Rus teatrnı baş rejissöru Mawlet Tulparow, Dağıstannı xalq yazıwçusu Kämal Abukow, Dağıstan pedagogika uniwersitetni professoru Tacutdin Bijamow, Awar teatrnı direktoru Xabib Haciew, Dargi teatrnı rejisseru Soltan İbrahimow “Yoldaş” gazetni baş redaktorunu zamestiteli Alqılıçew, xirurg İsayew wa köp özgeleri Zubayıl Canbekowiçni adamlığını, haqlığını, onu pahmusunu, namusunu wa adamğa kömekge yetişmege hasil turağanlığını haqında ayrıça esgerdiler. Xyasownu atına baqğan yaqdan yala yabuwlağa qazaplanağanın yaşırmay aytdılar.
Mitiñni axırında Canbek Xyasow şu qayğılı gününde ağawunu qısmatına özleni lap yuwuq adamına yimik yanaşğanı uçun ata yurtlularına, barı da qurdaşlarına, dos-yuwuğuna haq yürekden barakalla bildirdi.
Cıyılğanlar: “Paraxat yat, asil yürekli Zubayıl, biz seni bir zamanda da unutmajaqbız”, -- dep dertleşe turup qara yerge girip yatğan yoldaşı bulan sawbollaşdılar.
Bizin muxbiribiz.